#手足投稿 #值得睇晒全文
#手足投稿
#值得睇晒全文
10.9.2021 记录
节录：// 理大嘅事，喺接近两年嘅距离，我最记得仍然系警暴警暴同警暴。被捕后只因读医科而被枪射脚嘅FA、无晒 GEAR 情况下黑警刻意喺隔离狂放催泪弹（话曱甴钟意闻所以喺我哋隔离放好多）、几个钟唔俾郁，一郁就踢你打你、痛唔可以出声⋯⋯ 仲有去到狗屋后嘅屈辱⋯⋯ 一切一切或者都唔会上到大银幕，或者讲出嚟只能换到一啲眼泪但传唔到好远。
.
当晚点解要留，点解要走，已成过去争论都无谓。我只记得听住队友亦系现任男友被黑警虐待嘅情节。「系我带佢嚟嘅」呢句，令佢受到不必要暴力对待。但其实系我带佢去理大，只系我当时被㩒住亦唔能够浪费佢句说话嘅苦心。
.
因为理大一役，除咗警暴亦承受好多不必要伤害。出嚟后被跟踪、被 hack account、屋企人朋友被跟踪调查、被所谓同路人耻笑、被质问⋯⋯ 因为暴动，之后亦因为其他革命罪行，我哋喺长刑期定流亡下选择离开香港，承受好大段自责时间，亦承受住好多不必要压力（包括被所谓同路人利用压力）。.
当时律师仲话我加加埋埋可能廿年，而家回望，可能系终身监禁。然而我哋做错啲咩？即使只计理大一役，我哋都应该要坐 4-5 年？喺「真系班学生搞搞阵㖞！」呢句下，系唔系应该至少问一条问题：点解我哋唔返屋企打机唔去行街拍拖，要去「搞搞阵」？
.
男友隔住半个地球，有次同我倾电话，佢讲笑咁话：「我哋一早识，但谂返转头，根本无拍过拖，所有一齐出街唔系去游行就系去集会去打，我都从未拖过你只手行街。」谂返理大𠮶晚，我哋原本真系约咗去拍吓拖，结果都系入咗理大，然后就打到入埋狗屋。当日打得最激时，我哋有段时间轮流休息，坚持落去嘅动力就系学校入面某位置有人等紧自己返去，唔死得住。
.
理大我哋唔系以玩嘅心态入去，当然我唔知有无人其实系谂住玩咁入去，至少我哋认真嘅人入面无人玩紧。
.
如果想认识理大发生咩事，或有人睇完《理大围城》后觉得唔知抗争为乜唔明点解要冲嘅，建议去理解多次 2019 年发生咩事。问心𠮶句，我知道理大系一次失败，但系咪失败等于我哋抵死，或者只谴责留咗喺度打嘅人而无视对家打压及暴力？//
#理大 #polyu #理大围城 #香港独立唯一出路 #手足不是condom #hkprotest #前线
